立法會議員經過四日廣東考察後，部份人暴露咗其「港喱」水平。一啲經常去大陸嘅保皇派議員走馬看花睇完港珠澳大橋嘅工程進度之後，話發現內地基建勁過香港，香港要急起直追。唔係呀，家先知？部份人仲搞笑，連燈都唔識熄，有團員透露民記副主席劉江華係其中一人，連外地傳媒都報道，話有香港議員「鬧出笑話」，唔識熄酒店床邊燈，搞到成晚瞓唔着，有人仲要拆咗燈膽至瞓得着。
成班港喱發現新大陸，講明此行會六四 Tee上身嘅白鴿黨甘威亦有發現，佢同班無證黨友去咗廣州上下九步行街時，膽粗粗着住件六四 Tee四圍行，但身邊嘅廣州市民似乎冇乜反應，好似唔多明件 Tee有乜意思，唔知係咪因為內地封鎖資訊，但甘威認為成功喺大陸公開着件六四 Tee示眾，已經好有意義。
有議員爆料，話此行內地除派出多個官員到實一實外，又經常要警察為考察團開路，搞到議員去邊就塞車塞到邊。議員參觀廣州垃圾焚燒發電廠時，更發現一個奇怪現象，就係竟然一啲垃圾味都冇，搞到有議員懷疑，個發電廠究竟係咪喺佢哋嚟之前暫停運作幾日，等佢哋聞唔到垃圾味。
社民連陳偉業日前出席座談會時，成為唯一向內地官員提問六四嘅泛民成員，大嚿噚日講起件事，就話會後第一時間多謝白鴿黨主席仁哥同何秀蘭，因為根據立法會曾鈺成安排，佢嘅提問機會被排到有咁後就咁後，如果唔係仁哥、何秀蘭讓路，佢都問唔到呢條問題。
大嚿又爆料，話參加座談會時，拎出兩本六四書刊後，廣東省副省長萬慶良即時拉埋曾鈺成開咗幾分鐘會議，據知其中一個話題，就係點處理嗰兩本書。有泛民成員話，大嚿呢兩本六四書同甘威送出嘅六四 Tee，最終都係由立法會秘書處代為轉交廣東省當局，最終去唔去到萬慶良手上，實在存疑。萬慶良今次禮又唔親手接，六四、回鄉證問題又一概唔回應，難怪班泛民議員話失望，叫曾鈺成快啲喺內地擺酒結婚，等佢哋再上多次去睇真啲。
(090519@香港蘋果)
沒有留言:
張貼留言