慘遭隔離七日嘅維景旅客，獲釋後終於感覺到自由嘅可貴，參加「雙規」廣東考察團嘅泛民議員，噚晚終於可以呼吸自由空氣，同內地官員食完晚飯夜遊珠江後有機會自由行，喺廣州行街。
活化舊區值得參考
幾個無證議員久未踏足內地，人生路不熟，由有回鄉證、以前不時返內地公幹嘅甘乃威帶隊，晚上去到廣州最熱鬧嘅上下九路步行街，該處旺盛程度媲美香港旺角，繁華氣氛十足彌敦道，幾個議員好似大鄉里出城，對五光十色店舖嘆為觀止。
甘乃威話去上下九路唔止行街咁簡單，同時會睇吓廣州保育成績，因為當地政府花好多工夫保留有近百年歷史，共 200幾幢騎樓式建築物，算係活化古蹟嘅成功例子，香港要活化舊區，值得參考吓。考察團噚日先到深圳機場視察貨運設施，議員見識到深圳喺物流業方面嚴重威脅香港都嚇一驚。
議員亦去考察深圳堆填區，余若薇讚內地垃圾源頭分類工作做得幾好，堆填區臭味亦似乎冇香港咁犀利，香港應該改善吓。考察團今日會同廣東省官員會面，聽日去珠海視察後返港。
(090517@香港蘋果)
沒有留言:
張貼留言